November 29, 2007


சற்றே குறைய

எவ்வளவு நிறைந்திருந்தாலும்
குறை குடமாக்குவது எளிது

ஆட்டத்தின் போக்கிலும் எதிராகவும்
அசையும் இடுப்பும் இயங்கும் கால்களும்
குதூகலமாக்கும் ஒரு நடையை

அப்போது வெளித் தெறிக்கும் நீர்

November 27, 2007


ஏன் இப்படி?

நீங்கள் என்ன கேட்பீர்கள்
சதா அலைந்து கொண்டிருக்கும் நாயிடம்?

நான் 'ஏன் இப்படி' என்று நாயிடம் கேட்பேன்

பதில் சொல்வதற்காக நிற்கும் நாயைப் பிடித்து
என்ன வேண்டுமானாலும் செய்வீர்கள் நீங்கள்

நான் 'ஏன் இப்படி' என்று உங்களைக் கேட்பேன்

November 22, 2007


உங்கள் உலகம்

விவாதமின்றி எல்லோரும் ஒப்புக் கொள்ளக்கூடிய ஒரு நல்லொழுக்கத்தை நீங்கள் கடைப்பிடித்து வருவதால் மனதில் உங்களைப் பற்றி ஒரு நல்ல எண்ணத்தைக் கொண்டிருக்கிறீர்கள். உள்ளூர உங்களுக்குத் தெரியும், அதற்கு நீங்கள் அடிமையாகி விட்டிருப்பது. ஓர் ஒப்பு உதாரணமாய் நீங்கள் இருக்கிறீர்கள் என்று பிறர் சொல்வது உம்மை பாதிப்பதில்லை. ஆனால், பிறழ நேர்ந்த அந்த கணத்தில், தவறு உம்மேல் இல்லை எனினும், உங்கள் முகம் பார்க்கும்படியாய் இல்லை. இது நீங்கள் தீவிரமாக இருக்க வேண்டிய சமயம். நீங்கள் புழங்கும் சூழலிலுள்ள மனிதர்களையும் பொருட்களையும் இறுக்கிக் கட்டுங்கள், அவரவர் இடத்திலிருந்து அசையாமலிருக்க. நகர்தல் என்பது உங்களுக்கு மட்டுமே சாத்தியமாக ஆகட்டும். அது உங்கள் உலகம்.

November 20, 2007


ஒளிச்சிதறலுக்குப் பின்

ஆளுக்கொரு நிறத்தை எடுத்துக் கொண்டனர். வெள்ளொளி கடந்து சென்ற முப்பட்டகத்தை இனி பரணிலேற்றலாம்.

November 19, 2007


அக்கறை

நீங்கள் கேட்கலாம்
'உனக்கென்ன அக்கறை?'

மண்ணுக்காக அக்கறைப்படுபவர் நீங்கள்.
மழை விழுவதற்காக அக்கறைப்படுகிறீர்கள்.
விலங்குகளுக்காக அக்கறைப்படுகிறீர்கள்.
(மாட்டை விலங்கென்று சொல்ல முடியாது)
மாட்டின் மீது மழை விழுந்தால் அக்கறைப்படுகிறீர்கள்.

இப்படி நீங்கள் பொதுவாக அக்கறைப்படுபவராக இருப்பதால்
உம்மேல் எனக்கு அக்கறை!